Бүгүн мектептерде биринчи коңгуроо кагылып, жаңы окуу жылы башталды

Бүгүн, 1-сентябрда мектептерде биринчи коңгуроо кагылып, жаңы окуу жылы башталды.

Агартуу министрлигинен билдиришкендей, быйылкы окуу жылынан тарта 12 жылдык билим берүү системасы ишке кирет. Бардык класстар үчүн — 1-класстан 12-класска чейинки предметтик стандарттар жана программалар жаңыртылды. Ошондой эле биринчи жолу жаңы муундагы окуу китептерин массалык түрдө басып чыгарууга мамлекет тарабынан 744 млн сом бөлүндү.

Министрлик алгачкы сабактардын темаларын аныктады:

• 1-класстар үчүн — «Мен мектепке барам — билимдин кенчи!»;
• 2—4-класстар үчүн — «Менин сүйүктүү мектебим — менин гүлдөгөн Мекеним!»;
• 5–9-класстар үчүн — «Мен ким болгум келет жана мектеп бул жагынан мага кандай жардам берет?»;
• 10–11-класстар үчүн — «Келечектин билими: «Алтын Казык» программасы мага эмне берет?»

Белгилей кетсек, өлкө боюнча жалпы 2384 мектеп бар. Аларда 1,5 миллиондон ашык бала окуйт.

Окуучуларга 93 миңден ашык мугалим сабак берет.

Быйыл 207 миңге жакын бала 1-2-класска барат.