Мэр: Былтыр шаардын жолдорун бир сезондо оңдосо болорун далилдедик

Бишкек шаарынын мэри Айбек Жунушалиев 2024-жылы мэрия жол курулушун бир сезондо бүтүрсө болорун далилдегенин билдирди.

Анын айтымында, май айынан октябрга чейин бардык жолдордун курулуш иштерин бүтүрүүнүн так графиги түзүлгөн.

“Биз кышка чейин калтырбайбыз. Жогоруда белгилеп өткөн убакытта курулуш иштерин бүтүрүүгө бардык шарттар бар. Канчалык тезирээк куруп бүтсөк, ошончолук көп каражат үнөмдөйбүз. Былтыр 415 миллион сомду үнөмдөй алдык. Быйыл дагы жолдорду мөөнөтүнөн мурда оңдоого аракет кылып, каражат үнөмдөйбүз деп ойлойм”, — деди мэр.

Айбек Жунушалиев ошондой эле Бишкектин көптөгөн жол тилкелери мөөнөтүнөн мурда, тагыраагы бир-эки жумага эрте бүткөрүлүп жатканын кошумчалады.

Белгилей кетсек, учурда төмөнкү көчөлөр реконструкцияланууда:

• Чүй проспектиси — Абдрахманов көчөсүнөн Ибраимов көчөсүнө чейин (транспорт кыймылы убактылуу жабылган).
• Медеров, Юнусалиев жана Панфилов көчөлөрү активдүү фазада иштеп жатат.
• Жаш Гвардия бульвары — батыш тарабы толугу менен ачык, чыгыш тарабында курулуш иштери уланууда.
• 7-апрелден Юнусалиевке чейинки тилкеде унаа кыймылы ачык.

2025-жылы Бишкектин 8 борбордук көчөсүн реконструкциялоо иштери башталып, анын үчөөндө иштер жүрүп жатат. Тизмеге төмөнкүлөр кирет:

• Лев Толстой көчөсү — Калык Акиев көчөсүнөн Ибраимов көчөсүнө чейин;
• Москва көчөсү — Жаш Гвардия бульварынан Фучик көчөсүнө чейин;
• Ахунбаев көчөсүнөн — Жукеев-Пудовкин көчөсүндөгү айланма жолго чейин;
• Курманжан Датка көчөсү– Чүй проспектисинен Жибек-Жолу проспектисине чейин (жумуш августтун аягында “Бишкекжылуулук” ишканасына жылуулук трассасы алмаштырылгандан кийин башталат);
• Шабдан Баатыр көчөсү – Лермонтов көчөсүнө чейин.

Жаңы көчө куруу долбоору:

Токтогул көчөсү — Абсамат Масалиев проспектисинен Чыңгыз Айтматов проспектисине чейин (Молодежный турак жай аймагы аркылуу).

Долбоорлоо баскычында дагы үч жаңы көчө бар:

• Сухэ-Батор көчөсү — 7-апрель көчөсүнөн Ауэзов көчөсүнө чейин;
• Ахунбаев көчөсү — Достоевский көчөсүнөн Ауэзов көчөсүнө чейин;
• Ауэзов көчөсү — Анкара көчөсүнөн Сухэ-Батор көчөсүнө чейин.