Чолпон-Ата шаарын жана дагы үч айылды сел каптады

Ысык-Көл районунда нөшөрлөгөн жамгырдан улам Чолпон-Ата шаарын жана дагы үч айылды сел каптаганын ӨКМден билдиришти.
«Чолпон-Ата шаарынын Тогуз-Булак тилкесиндеги кокту-колоттордон аккан суулар көчөлөргө жайылып жана «Жүдөмүш» каналында сел жүрүп жаткандыгы боюнча маалымат түшкөн. Бостери, Бактуу-Долоноту айылдарынын бир нече көчөлөрүн, Булан-Сөгөттү айылын сел каптаган. Куткаруучулар Бактуу-Долонотулук бир үй-бүлөнү коопсуз жайга убактылуу көчүрдү», — деп билдиришти ӨКМден.
Министрликтен дагы кошумча маалымат берерин айтышты.

Ал арада социалдык тармактарда караңгы кирип калганда селдин Чолпон-Ата шаарынын көчөсүнө толтура келип, автоунааларды агызып кете жаздаган видеолору тарады.
Кыргызгидромет бир нече күндөн бери шашылыш билдирүү таратып, нөшөрлүү жамгырдан улам сел жүрүшү мүмкүндүгүн эскертүүдө.