Жогорку Кеңештин төрагасы Кыргыз Республикасынын президентин шайлоо күнү иш күнүнө туш келерин эске салды. Бул тууралуу Марлен Маматалиев бүгүн, 24-сентябрда Жогорку Кеңештин жыйынында билдирди.
Анын айтымында, буга чейинки президенттик шайлоолордун баары дем алыш күндөрү өтүп келген. «Шайлоо биринчи жолу шаршемби күнү өтөт. Бул шайлоочулардын катышуусун жогорулатуу максатында жасалды.
27-январь жумуш күнү болот жана добуш берүү тилкелерине келгендерге айлык акы эсептелет. Тиешелүү түрдө келбегендерге айлык акы эсептелбейт, демек, бул келечектеги пенсияны эсептөөгө да таасирин тийгизет. Келбегендерди БШКнын тизмеси боюнча аныктап алууга болот», — деп белгиледи Марлен Маматалиев.
Ал шайлоого канчалык көп адам келсе, коррупциялык көрүнүштөр ошончолук аз болорун кошумчалады. «Конституциянын 21-беренесине ылайык, депутаттар жана Кыргызстандын президенти өз ыйгарым укуктарын тапшырышпайт.
Бул өлкөдөгү туруктуулукту сактоо үчүн жасалууда. Себеби ар кандай күтүлбөгөн кырдаалдар болушу мүмкүн, шайлоо өлкөдөгү кырдаалга терс таасирин тийгизбеши керек», — деп эсептейт төрага.
Төрага өлкөдө административдик ресурс дээрлик колдонулбай калганын белгиледи.
«Шайлоодо агитаторлордун саны 1 миңден 300гө чейин кыскартылган. Ал эми президенттик шайлоого токтолсок, бул жерде да агитаторлордун санын дээрлик эки эсеге азайттык. Жалпысынан, алдыдагы президенттик шайлоо мыйзамдуу негизде жана өз убагында өтүшү керек», — деп кошумчалады Марлен Маматалиев.
Бүгүн парламент Кыргызстандын президентин шайлоо күнүн — 27-январды бекитүү тууралуу токтом кабыл алды.
Загрузка ...
