Эдил Байсалов Дональд Трамптын Палестинаны көчүрүү сунушун айыптады. Бул тууралуу минкабтын аппаратынын басма сөз кызматы билдирет.
БУУнун Адам укуктары боюнча кеңешинин сессиясында министрлер кабинетинин төрагасынын орун басары Эдил Байсалов Палестинадагы кырдаалга өзгөчө көңүл бурду. Ал эл аралык коомчулукту адилеттүүлүктү жана Палестина элинин укуктарын коргоо үчүн чечкиндүү чараларды көрүүгө чакырды.
«Палестиналык калкты мажбурлап көчүрүү аракеттери этникалык тазалоодон эч айырмасы жок. Биз мындай демилгелерди кескин түрдө четке кагабыз жана эл аралык коомчулукту бүтүндөй бир элди жамааттык жазалоого жол бербөөгө чакырабыз», — деди Байсалов.
Ал Кыргызстан Палестина элинин өз тагдырын өзү аныктоо укугун колдой турганын ырастады жана узак мөөнөттүү тынчтык эл аралык укукту урматтоо жана тең укуктуу диалог аркылуу гана мүмкүн экенин белгиледи.
Палестиналыктарды башка жерге жайгаштыруу сунушун АКШ президенти Дональд Трамп көтөргөн. Акыркы жумаларда ал палестиналыктарды Египетке жана Иорданияга көчүрүү боюнча «тазалоо» пландарын айтып, алар үчүн үй курууну сунуштады жана Газа тилкесин «Жакынкы Чыгыш Ривьерасына» айлантууну сунуштады.
Бул пландарды Египет, Иордания жана Палестина автономиясынын жетекчилиги четке какты.
Загрузка ...
