Көлбаевдин уюшкан кылмыштуу тобун каржылаган деген шек менен мурдагы мэр кармалды

Чолпон-Ата шаарынын мурдагы мэри Камчы Көлбаевдин уюшкан кылмыштуу тобун каржылаган деген шек менен кармалды. Бул тууралуу УКМК билдирди.

Атайын кызматтын маалыматында, криминалдык чөйрөдө «Потап» лакап аты менен белгилүү болгон экс-мэр С.Т.К. Камчы Көлбаев менен жакын мамиледе болгон. 2017-жылы ал Көлбаевдин Чолпон-Ата шаарындагы бизнес долбоорлорун жүргүзүү үчүн аталган шаардын мэри болуп шайланганы аныкталган.

УКМК мындан тышкары экс-мэр криминалдык чөйрөдөгү абалын пайдаланып, айрым адамдарга жана ишкерлерге колдоо көрсөтүп, ал үчүн акча каражаттарын алганын билдирди.

Аталган фактылардын негизинде С.Т.К. кармалып, соттун чечими менен тергөө абагына киргизилген.