2026-жылдын башына карата Кыргызстандын калкынын саны 7 миллион 404 миң кишиге жетти. Бул тууралуу Улуттук статистика комитети билдирди
Бир жыл ичинде өлкө калкы 1,7 пайызга көбөйдү. Өсүүнүн эң жогорку темпи Бишкек шаарында (2,8 пайыз), Ош шаарында (2,6 пайыз) жана Баткен облусунда (1,8 пайыз) катталды. Эң төмөнкү көрсөткүч — Ысык-Көл (0,8 пайыз) жана Нарын (0,4 пайыз) облустарында болду.
Ошол эле учурда өлкөдө шаар калкынын өсүшү уланууда. Эгерде бир жыл мурун шаарларда тургундардын 41,7 пайызы жашаса, азыр бул көрсөткүч 42,3 пайызды түздү. Айыл калкынын үлүшү 57,7 пайызга чейин төмөндөдү.
Кыргызстанда дагы деле аялдардын саны эркектерге караганда бир аз көп. Жылдын башына карата республикада 3,74 миллион аял (50,5 пайыз) жана 3,664 миллион эркек (49,5 пайыз) жашаган. Ошол эле учурда Баткен, Ош, Жалал-Абад, Нарын жана Талас облустарында эркектердин саны аялдарга караганда көп.
2025-жылы өлкөдө 140,5 миң ымыркай катталса, 2021-жылы бул көрсөткүч 150,2 миңди түзгөн. Төрөлүүнүн жалпы коэффициенти миң тургунга алганда 21,9дан 19,1ге чейин төмөндөгөн.
Энелердин бала төрөгөндөгү орточо жашы 28,5 жашка чейин жогорулады. Эң жаш энелер Ош облусунда жашашат — орточо эсеп менен 27,9 жаш.
Ошондой эле статистика өспүрүмдөр арасында төрөттүн азайганын көрсөтүүдө. Эгерде 2021-жылы 15-17 жаштагы миң кызга 3,5 төрөт туура келсе, 2025-жылы бул көрсөткүч 1,9ду түзгөн, бул дээрлик 1,8 эсеге аз. Ошол эле учурда жашы жете электер арасында төрөлүүнүн эң жогорку көрсөткүчтөрү Чүй облусунда жана Ош шаарында катталган.
Өткөн жылы төрөлүүнүн эң жогорку деңгээли Баткен облусунда катталган — миң тургунга 23,4 ымыркай туура келген. Андан кийинки орундарда Ош (22,1), Жалал-Абад (21,7) жана Нарын (20,8) облустары турат.
Загрузка ...
