12-июндан 14-июнга чейин Альп тоолорунда 10 альпинист каза болду. Кырсыктар Италия, Франция жана Швейцариянын Альп тоолорунда, ошондой эле Германиянын аймагындагы Түндүк Акиташ Альпыларында катталган. Бул тууралуу Bild басылмасы билдирди.
12-июнда Италиянын Альп тоолорундагы Гран-Парадизо (4061 м) тоосунун түндүк капталынан үч италиялык альпинист кулап кеткен. Куткаруучулар алардын сөөгүн деңиз деңгээлинен болжол менен 3,6 миң метр бийиктиктен табышкан.
Эртеси күнү Монблан тоо массивинин Франция тарабында дагы үч альпинист каза болгон. Алардын экөө Мон-Моди (4465 м) тоосунда болгон. Үчүнчү альпинисттин сөөгү Монблан тоосунун Италия тарабында табылган.
13-июнда Швейцариядагы Маттерхорн (4478 м) тоосунда франциялык альпинист каза болгон. Анын сөөгүн куткаруу кызматтары тапкан.
Ошол эле күнү Германиядагы Миттенвальд жамаатына жакын жайгашкан Карвендель (2749 м) тоосуна чыгуу учурунда дагы бир альпинист болжол менен 130 метр бийиктиктен кулап кеткен. Ал алган жаракаттарынан улам көз жумган.
14-июнда Италиянын Виченца жана Тренто провинцияларынын чек арасында дагы эки альпинист каза болду. Алар болжол менен 100 метр бийиктиктен кулап кетишкен. Алар менен бирге болгон дагы бир альпинист тик учак аркылуу эвакуацияланган.
Загрузка ...
