Министрлер кабинетинин төрагасы Адылбек Касымалиев «Манас» эл аралык аэропортун реконструкциялоонун жүрүшү менен таанышты.
Минкаб төрагасына аэропорттун инфраструктурасын модернизациялоо боюнча жүргүзүлүп жаткан иштер тууралуу маалымат берилди, ал учуу коопсуздугун жогорулатуу, өлкөнүн транспорттук мүмкүнчүлүктөрүн кеңейтүү, эл аралык авиациялык картадагы позициясын бекемдөөгө багытталган.
Аэропорт комплексин масштабдуу реконструкциялоонун алкагында терминал 20 миң чарчы метрге кеңейтилүүдө. Курулуштун бардык фазалары аяктагандан кийин терминалдын жалпы аянты болжол менен 60 000 чарчы метрди түзөт. Жаңы терминал аэропорттун өткөрүү мүмкүнчүлүгүн бир топ жогорулатып, жүргүнчүлөрдү тейлөөнүн сапатын жакшыртып, эл аралык стандарттарга жооп берген шарттарды түзөт.
“Манас” аэропорту учуу-конуу тилкесин капиталдык оңдоодон өткөрдү жана CAT III заманбап жарыктандыруу системасын орнотту, бул коюу туманда жана көрүү чектелген учурда да учуу иштерин жүргүзүүгө мүмкүндүк берет. Жабык унаа токтотуучу жайдын курулушу жүрүп жатат.
Кошумчалай кетсек, аэропортко жаңы кирүүчү жолдун курулушу жүрүп жатат, ал аэропорттун өткөрүү мүмкүнчүлүгүн жогорулатат, кыймылдын коопсуздугун камсыздайт жана терминалга жүргүнчүлөр үчүн ыңгайлуу шарттарды түзөт. Унаа токтотуучу жай менен аэропорттун терминалынын ортосунда аба ырайынын шарттарына карабастан жыл бою жүргүнчүлөрдүн ыңгайлуу кыймылын камсыз кылуучу жабык жөө адамдар өтүүчү жол курулат.
Министрлер кабинетинин төрагасы бардык курулуш иштерин өз убагында жана сапаттуу бүткөрүүнүн маанилүүлүгүн белгилеп, Кыргызстанды Европа биримдигине учууга тыюу салынган авиакомпаниялардын тизмесинен чыгаруу авиация тармагын мындан ары өнүктүрүү үчүн олуттуу мүмкүнчүлүктөрдү ачаарын белгиледи.
Загрузка ...
