Бишкекте мас айдоочу жол тескөөчүнү сүйрөп кетти

Бишкекте мас айдоочу милиция кызматкерин унаанын капотуна сүйрөп кетти. Бул тууралуу Ленин райондук милициясынан билдиришти.

Маалыматка ылайык, 19-январда Toyota Estima унаасынын күбөлүгү жок мас айдоочусу милиция кызматкеринин унааны токтотуу боюнча мыйзамдуу талабына баш ийбей, кызматкердин бирин капотунда 50 метрден ашык аралыкка чейин сүйрөп кеткен.

Бул факты каттоого алынып, айдоочу 1986-жылы туулган Т.И. Ленин райондук ИИБге жеткирилген. Ага карата «Майда бейбаштык» беренеси менен протокол түзүлүп, андан кийин убактылуу кармоочу жайга киргизилди.

Ички иштер органдары айдоочуларды мыйзам талаптарын жана ички иштер органдарынын кызматкерлеринин мыйзамдуу талаптарын так сактоого чакырат.