Пиротехникалык каражаттарды сатууга жана колдонууга жаңы чектөө киргизилди

Кыргызстанда пиротехникалык каражаттарды сатууга жана колдонууга жаңы чектөөлөр киргизилди. Бул тууралуу Токтом маалыматтык-укуктук порталында маалымдалат.

Министрлер кабинетинин 2026-жылдын 10-августундагы №534 токтому менен Кыргызстандын аймагында жарандык пиротехникалык каражаттардын айлануу эрежелери бекитилди.

Токтомдо пиротехникаларды сатууга карата катуу чектөөлөр белгиленген. Ага ылайык, пиротехниканын кандай гана түрү болбосун, аларды сатууга эми атайын адистештирилген дүкөндөр аркылуу гана уруксат берилет.

Ошондой эле пиротехникалардан чыккан ызы-чуунун жана үн басымынын белгиленген деңгээлден ашуусуна төмөнкү убактарда тыюу салынды:

• Иш күндөрү: саат 22:00дөн 07:00гө чейин;
• Дем алыш жана майрам күндөрү: саат 22:00дөн 09:00гө чейин.

Токтом расмий жарыяланган күндөн тартып 10 күн өткөндөн кийин күчүнө кирет.