Бишкек мэриясы эскертет! Саат 22:00дөн кийин той-топур, көңүл ачуу токтойт

Бишкек шаарынын мэриясы шаар тургундарынын тынчтыгын жана бейпилдигин камсыздоо, ошондой эле «Тынчтык жөнүндө» мыйзамынын талаптарын аткаруу максатында атайын буйрук чыгарды.

Аталган буйрукка ылайык, Бишкек шаарындагы бардык коомдук тамактануу жана маданий-көңүл ачуу мекемелеринин (кафе, ресторан, бар, клуб, банкет залдары) жетекчилери бир катар милдеттерди аткарууга тийиш:

Иштөө тартибине киргизилген негизги чектөөлөр:

• Иш-чараларды жана ишти токтотуу:Бардык салтанаттуу, маданий-көңүл ачуу иш-чаралары токтотулуп, мекемелердин иши саат 22:00дөн кечиктирбестен аякташы керек.
• Электр жабдууларын өчүрүү: Саат 22:00дөн кийин электр энергиясын көп талап кылган бардык жабдуулар (электр мештери, жылытуучу приборлор, тандырлар ж.б.) толугу менен өчүрүлүшү зарыл.
• Тынчтыкты сактоо: Белгиленген убакыттан кийин катуу музыка, жарык берүүчү жабдуулар же жарандардын тынчтыгын бузган башка аракеттер менен коштолгон иш-чараларды өткөрүүгө тыюу салынат.

Генераторлорду колдонууга уруксат

Өзгөчө шарт: Турак жайлардан алыс жайгашкан объектилерге жана «Тынчтык жөнүндө» мыйзамдын бардык талаптары толук сакталган учурда гана электр генераторлорун колдонууга уруксат берилет.

Райондук администрациялар жана муниципалдык инспекция бул буйруктун аткарылышын көзөмөлгө алып, үзгүлтүксүз рейддик иш-чараларды өткөрүп турууга милдеттендирилди.

Мэрия жарандарды белгиленген тартипти сактоого жана шаар тургундарынын бейпилдигине көмөк көрсөтүүгө чакырат.