
ИИМдин Кылмыш иликтөө башкы башкармалыгынын кызматкерлери Сокулук районундагы шаар куруу жана архитектура боюнча башкармалыгынын кызмат адамдарынын коррупциялык аракеттерин тастыктаган фактыны аныкташты.
Шектүүлөр алдын ала макулдашып алышып, кызматтык абалдарынан пайдалануу менен жеке жактарга муниципалдык менчикти мыйзамсыз берип коюшкан.
Тергөөнүн маалыматы боюнча 2024-жылы Сокулук районундагы шаар куруу жана архитектура боюнча башкармалыгынын кызмат адамдары өздөрүнүн жеке материалдык кызыкчылыктарын көздөшүп, 16 сотка болгон жер тилкесинин максатттуу пайдалануу багытын мыйзамсыз өзгөртүшкөн.
Анткени, ал жер тилкеси социалдык-маданий, тиричилик багытындагы объектилерди куруу үчүн арналганы менен жеке турак жай курууга берилип кеткен. Ошентип алар муниципалдык менчиктен бул жер тилкесин чыгарып алышкан.
Мамлекетке 4 300 000 сомдон ашык суммада материалдык чыгым келтирилген.
Топтолгон материалдардын негизинде Кыргыз Республикасынын Кылмыш-жаза кодексинин 336-беренесинин 2-бөлүмү (Коррупция) менен кылмыш иши козголгон.
Мындан аркы тергөө-ыкчам иш-чараларын жүргүзүү учурунда коррупция беренесине шектүү катары мурда Сокулук районундагы шаар куруу жана архитектура боюнча башкармалыгынын башчысы болуп иштеген Чүй облусунун райондорунун биринин шаар куруу жана архитектура боюнча башкармалыгынын башчысы 1965-жылы туулган Ж.О. аттуу жаран кармалды.
Тергөөнү ИИМдин Тергөө кызматы жүргүзүп жатат.
ИИМдин Басма сөз кызматы