Мамлекеттик кызматкерлер триатлондо күч сынашат 

Мамлекеттик кызматкерлер арасында триатлон боюнча «Жаңы жол» реалити-шоусу уюштурулат. Бул тууралуу Дене тарбия жана спорт мамлекеттик агенттигинен билдиришти.

Спорттук иш-чара Триатлон федерациясы менен биргеликте уюштурулат.

Кыргызстанда алгачкы жолу өткөрүлүп жаткан бул долбоорго мамлекеттик кызматта же бюджеттик уюмдарда иштеген, спорттук разряддары жок жана мурда профессионалдык деңгээлде спорт менен машыкпаган 10 кызматкер тандалып алынат.

Катышуучуларга чуркоо, сууда сүзүү жана велосипед тебүү боюнча машыгуулар уюштурулат.

Бул кандай долбоор?

Бул — мамлекеттик кызматкерлердин спорттук өзгөрүүсүн көрсөткөн реалити-шоу. Сизди 6,5 ай бою кесипкөй машыктыруучулар машыктырат, ал эми сиздин жетишкендиктериңизди бүт өлкө телекөрсөтүү же интернет аркылуу көрүп турат.

Катышуучулар 13-сентябрдагы триатлон боюнча Азия кубогуна катышып, маарага жетиши керек.

Кимдер катыша алат?

1. Иштеген жери: Мамлекеттик орган, муниципалдык кызмат же бюджеттик мекеме.
2. Стажы: Мамлекеттик кызматта кеминде 5 жылдык тажрыйба.
3. Жашы: 28ден 38 жашка чейин.
4. Тил: Кыргыз тилинде эркин сүйлөө.
5. Спорттук деңгээл: Сиз профессионал спортчу болбошуңуз керек (триатлон менен мурда машыккандар кабыл алынбайт).
6. Ден соолук: Спортко уруксат берген медициналык маалымкат жана камерага тартылууга макулдук.

Уюштуруучулар эмне менен камсыздайт?

• акысыз машыгуу базасы жана профессионал машыктыруучулар.
• сууда сүзүү, чуркоо жана веложүрүш боюнча атайын программа.
• машыгуу жана мелдеш үчүн велосипеддер берилет.

Кантип катышуу керек?

1. Анкета толтуруңуз: https://forms.gle/WCdzguqpvxKGdHB78 шилтемеси аркылуу Google-форманы толтуруңуз.
2. Видео тартыңыз: Өзүңүз жөнүндө жана эмне үчүн катышууну каалаарыңыз тууралуу 1-2 мүнөттүк видео даярдап, тиркеңиз.
3. Документтер: Иш ордунан маалымкат жана медициналык кагаздарды даярдаңыз.

Катышуучулар жумасына кеминде 3 жолу, 2 сааттан кем эмес машыгууга убакыт бөлүүгө тийиш.