YouTube Трамп менен болгон соттук талашты чечүү үчүн $24,5 млн төлөйт

YouTube (Alphabet Inc.) каналы АКШ президенти Дональд Трамптын дооматтарын жөнгө салуу максатында 24,5 млн доллар төлөөгө макул болду. Бул тууралуу Интерфакс агенттиги жазды.

Маалыматка ылайык, бул дооматтар Трамптын аккаунту 2021-жылдын январында Капитолийдеги башаламандыктардан кийин чектелгенине байланыштуу коюлган.

Калифорниянын Түндүк округдук соту бул келишим YouTube тарабынан күнөөнү же жоопкерчиликти моюнга алуу дегенди билдирбестигин баса белгиледи.

Трамп 2021-жылдын ортосунда YouTube, Facebook (Meta) жана Twitter (азыркы X) компанияларын сотко берген. Социалдык тармактар анын аккаунттарын «зордук-зомбулукка чакырык болушу мүмкүн» деген жүйө менен чектеген.

2025-жылы Трамп Ак үйгө кайтып келгенден кийин IT-компаниялар президент менен соттук талаштарды жөнгө салууга аракет кылууда. Meta январда 25 млн доллар төлөөгө макул болгон, ал эми X (Twitter) – 10 млн доллар.

YouTube Трамптын аккаунтун толугу менен жапкан эмес, болгону видео жүктөө мүмкүнчүлүгүн убактылуу чектеген. Бул мүмкүнчүлүк ага 2023-жылы кайра берилген.

Ошол эле учурда, 2025-жылдын башынан тартып Alphabet компаниясынын акциялары 28,9% өскөн.