Айдоочулардын эсине! Абдрахманов көчөсүндө унаа кыймылы убактылуу чектелет

Бишкектин Жусуп Абдрахманов көчөсүндө унаа кыймылын убактылуу жана этап-этабы менен чектөө чечими кабыл алынды.

Муниципалитеттен билдиришкендей, кыймыл жер алдындагы жөө адамдар өтүүчү өтмөктөрдү курууга байланыштуу чектелмекчи.

Тактап айтканда, 2-октябрдан тарта 10 күн ичинде аталган тилкеде тийиштүү курулуш иштери жүргүзүлөт.

Унаа кыймылына киргизилген чектөө — жумуштарды өз убагында аткаруу үчүн зарыл болгон убактылуу чара. Жолдун эки тарабы тең курулуштун жүрүшүнө жараша кезеги менен жабылып турат.

Жер алдындагы өтмөктөр төмөнкү даректерде курулат:

• Ж. Абдрахманов көчөсүндө (курулуп жаткан мечиттин жанында);
• Кыргызстан менен Азербайжандын Достук сейил багынын аймагында.

Бишкек мэриясы шаар тургундарын жана борбор калаанын конокторун убактылуу чектөөлөргө түшүнүү менен мамиле кылууну, каттамдарды алдын ала пландап, жол белгилеринин талаптарын так сактоону өтүнөт.