Кечээ, 22-октябрда Кыргызстандын белгилүү ишмери Базарбай Эстебесович Мамбетов узакка созулган оорудан улам каза болду. Бул тууралуу анын үй-бүлөсү билдирди.
Мамбетов 1948-жылы 6-майда Талас районунун Балбал айылында туулган. Мектепти бүтүргөндөн кийин Москвадагы Куйбышев атындагы инженердик-курулуш институтун жана коомдук илимдер академиясын бүтүргөн.
Ал 1985-жылы Фрунзе шаарындагы Жеңиш аянтынын, Казарман алтын кен комбинатынын, Өкмөт үйүнүн, Ала-Тоо аянтындагы тарыхый музейдин, Ош жана Аламүдүн базарларынын курулушун жетектеген. Бүт өмүрүн курулуш тармагына арнап, Кыргыз Республикасынын эмгек сиңирген куруучусу наамын алган.
1988-жылы Армениянын Спитак шаарындагы катуу жер титирөөдөн кийин шаарды калыбына келтирүү иштерине катышкан.
Вице-премьер-министр болуп, ЕврАзЭС маселелерин жетектеп, Борбордук Азия жана КМШ өлкөлөрү менен соода-экономикалык байланыштарды түзгөн. 2011-2013-жылдары Кыргыз Республикасынын Түркмөнстандагы элчиси болгон.
Базарбай Мамбетов бир канча мамлекеттик сыйлыктар менен сыйланган.
Акыркы жылдары гидроэнергетиканы өнүктүрүүдө, өлкөнүн Борбордук Азиядагы стратегиялык суу-энергетикалык позициясын кеңири жайылтып, Нарын ГЭС каскадын курууну улантууда активдүү катышып келген.
Анын үч баласы жана жети небереси бар.
Базарбай Эстебесович Мамбетовдун үй-бүлөсүнө жана жакындарына терең кайгыруу менен көңүл айтып, аза кайгысын тең бөлүшөбүз.
Загрузка ...
