2026-жылдын январь — сентябрь айларынын жыйынтыгы боюнча ички дүң продукциянын (ИДП) көлөмү, алдын ала баалоолор боюнча, 1 триллион 640 миллиард 885,5 миллион сомго жетти. Улуттук статистика комитети билдиргендей, 2025-жылдын январь — сентябрына салыштырмалуу ал 10,8 пайызга өстү.
Бир ай ичинде ИДПнын өсүүсү бир аз жайлады — 2026-жылдын август айынын жыйынтыгы боюнча ал 11 пайызды түзгөн болчу.
ИДПнын жалпы көлөмүндө тейлөө чөйрөсүнүн үлүшү 48,7 пайыздан ашыкты, товар өндүрүү тармактары — 35,9 пайызды жана өнүмдөргө болгон таза салыктар — 15,4 пайызды түздү.
Өнөр жайда кайсы тармактар өсүү боюнча алдыда
Сегиз айдагы өнөр жай өндүрүшүнүн жалпы көлөмү 685 миллиард 387,8 миллион сомду түздү.
2025-жылдын январь — сентябрына салыштырмалуу өнөр жайдын 7 пайызга өсүшүн камсыздаган негизги тармактар төмөнкүлөр болду:
химиялык продукцияларды өндүрүү — 2,3 эсеге;
тазаланган мунай продуктуларын өндүрүү — 1,9 эсеге;
жыгач жана кагаз буюмдарын өндүрүү, полиграфиялык ишмердүүлүктүн өнүмдөрү — 41,3 пайызга;
транспорт каражаттары — 39,4 пайызга;
курулуш материалдарын өндүрүү — 29,1 пайызга.
Акыркы бир айда өндүрүш көлөмүнүн өсүшү боюнча лидерлердин бештиги өзгөргөн жок.
Ошол эле учурда негизги металлдарды өндүрүүнүн көлөмү 1,7 пайызга төмөндөдү.
Баалар кандай өзгөрүп жатат
Январь — сентябрь айларында керектөө бааларынын жана тарифтердин өсүшү (2025-жылдын декабрына салыштырмалуу) 8,1 пайызды түзүп, бир ай ичинде 0,5 пайыз кошулду. Жылдык туюнтууда инфляция 12,2 пайызга жетти.
2026-жылдын башынан бери баалардын өсүшү бардык негизги позициялар боюнча байкалды. Алсак, төмөнкүлөр кымбаттады:
калкка көрсөтүлүүчү кызматтарга тарифтер — 11,8 пайызга;
алкоголдук ичимдиктер жана тамеки буюмдары — 8 пайызга;
тамак-аш азыктары жана алкоголсуз суусундуктар — 7 пайызга;
азык-түлүк эмес товарлар — 6,8 пайызга.
Загрузка ...
